bhulaa do ranj kii baaton men kyaa hai - Shan ul Haq Haqi

bhulaa do ranj kii baaton men kyaa hai

idhar dekho merii aankhon men kyaa hai

bahut taariik din hai phir bhii dekho

ujaalaa chaandanii raaton men kyaa hai

nahiin paatiin jise bedaar nazaren

Khudaayaa ye mere Khvaabon men kyaa hai

ye kyaa dhuundhe chale jaatii hai duniyaa

tamaashaa-saa galii-kuuchon men kyaa hai

hai vahashat-sii ye har chehare pe kaisii

na jaane saham-saa nazaron men kyaa hai

ye ik haijaan-saa dariyaa men kyon hai

ye kuchh saamaan-saa maujon men kyaa hai

zaraa-saa bal hai ik zulfon kaa us kii

vagarnaa zor zanjiiron men kyaa hai

hain Khamyaaze suruur-e-aarazuu ke

nishaat-o-gam kaho naamon men kyaa hai

tumhaarii der-aamezii bhii dekhii

takalluf lakhanau vaalon men kyaa hai