bargashtaa-e-yazdaan se kuchh bhuul huii hai - Sagar Siddiqui
bargashtaa-e-yazdaan se kuchh bhuul huii hai
bhaTake hue insaan se kuchh bhuul huii hai
taa hadd-e-nazar shole hii shole hain chaman men
phuulon ke nigehbaan se kuchh bhuul huii hai
jis ahad men luT jaaye faqiiron kii kamaaii
us ahad ke sultaan se kuchh bhuul huii hai
hanSate hain merii suurat-e-maftuun pe shaguufe
mere dil-e-naadaan se kuchh bhuul huii hai
huuron kii talab aur mai-o-saagar se hai nafrat
zaahid tere irfaan se kuchh bhuul huii hai
0 comments:
Post a Comment