banaa gulaab to kaanten chubhaa gayaa ik shaKhs - Obaidullah Aleem
banaa gulaab to kaanten chubhaa gayaa ik shaKhs
huaa chiraag to ghar hii jalaa gayaa ik shaKhs
tamaam rang mere aur saare Khvaab mere
fasaanaa kah ke fasaanaa banaa gayaa ik shaKhs
main kis havaa men uduun kis fazaa men laharaauun
dukhon ke jaal har-suu bichhaa gayaa ik shaKhs
palat sakuun main na aage badh sakuun jis par
mujhe ye kaun se raaste lagaa gayaa ik shaKhs
muhabbaten bhii ajiib us kii nafaraten bhii kamaal
merii tarah kaa hii mujh men samaa gayaa ik shaKhs
vo mahataab thaa marham-ba-dast aayaa thaa
magar kuchh aur sivaa dil dukhaa gayaa ik shaKhs
khulaa ye raaz ke aaiinaa-Khaanaa hai duniyaa
aur is men mujh ko tamaashaa banaa gayaa ik shaKhs
0 comments:
Post a Comment