baith jaataa huun jahaan chaanv ghanii hotii hai - Hafeez Jaunpuri

baith jaataa huun jahaan chaanv ghanii hotii hai

haaye kyaa chiiz gariib-ul-vatanii hotii hai

din ko ik nuur barasataa hai merii turbat par

raat ko chaadar-e-mahataab tanii hotii hai

lut gayaa vo tere kuuche men rakhaa jis ne qadam

is tarah kii bhii kahiin raahazanii hotii hai

hijr men zahar hai saagar kaa lagaanaa muunh se

may kii jo buund hai hiiron kii kanii hotii hai

maikashon ko na kabhii fikr-e-kam-o-besh huii

aise logon kii tabiiyat bhii ganii hotii hai

huuk uthatii hai agar zabt-e-fugaan karataa huun

saans rukatii hai to barchhii kii anii hotii hai

pii lo do ghuunt ki saaqii kii rahe baat "hafeez"

saaf inkaar men khaatir-shikanii hotii hai