bahut hasiin hai meraa dilrubaa na ho jaaye - Ibrahim Ashk

bahut hasiin hai meraa dilrubaa na ho jaaye

merii nazar men vo kaafir Khudaa na ho jaaye

tamaam shahar men merii vafaa kii Khushbuu hai

puraanaa zaKhm kisii kaa haraa na ho jaaye

na jaane kitane baras baad vo milaa hai mujhe

hai dar yahii ki vo phir se judaa na ho jaaye

main us se tuut ke milataa huun jab bhii milataa huun

ye meraa milanaa kahiin haadasaa na ho jaaye