baaziichaa-e-atfaal hai duniyaa mere aage
baaziichaa-e-atfaal hai duniyaa mere aage
hotaa hai shab-o-roz tamaashaa mere aage
ik khel hai aurang-e-sulemaan mere nazadiik
ik baat hai ejaaz-e-masiihaa mere aage
juz naam nahiin suurat-e-aalam mujhe manzuur
juz vaham nahiin hastii-e-ashiyaa mere aage
hotaa hai nihaaN gard men seharaa mere hote
ghisataa hai jabiin Khaak pe dariyaa mere aage
mat puuchh ke kyaa haal hai meraa tere piichhe
tuu dekh ke kyaa rang hai teraa mere aage
sach kahate ho Khudbiin-o-Khudaaraa huuN na kyoN huuN
baiThaa hai but-e-aaiinaa siimaa mere aage
phir dekhiye andaaz-e-gulafshaanii-e-guftaar
rakh de koii paimaanaa-e-sahabaa mere aage
nafrat ka gumaaN guzare hai main rashk se guzaraa
kyoN kar kahuuN lo naam naa us kaa mere aage
imaaN mujhe roke hai jo khiinche hai mujhe kufr
kaabaa mere piichhe hai kaliisaa mere aage
aashiq huuN pe maashuuqfarebii hai mera kaam
majanuuN ko buraa kahatii hai lailaa mere aage
Khush hote hain par vasl men yuuN mar nahiin jaate
aaii shab-e-hijaraaN kii tamannaa mere aage
hai maujzan ik qulzum-e-KhuuN kaash! yahii ho
aataa hai abhii dekhiye kyaa-kyaa mere aage
go haath ko jumbish nahiin aaNkhon men to dam hai
rahane do abhii saaGar-o-miinaa mere aage
hampeshaa-o-hammasharab-o-hamraaz hai meraa
'Ghalib' ko buraa kyoN kaho achchhaa mere aage
0 comments:
Post a Comment