asar usako zaraa nahiin hotaa - Momin Khan Momin

asar usako zaraa nahiin hotaa

ranj raahat fazaa nahiin hotaa

tum hamaare kisii tarah na hue

varanaa duniyaa men kyaa nahiin hotaa

naarasaaii se dam ruke to ruke

main kisii se khafaa nahiin hotaa

tum mere paas hote ho goyaa

jab koii duusaraa nahiin hotaa

haal-e-dil yaar ko likhuun kyon kar

haath dil se judaa nahiin hotaa

kyon sune arz-e-muztarib ae 'momin'

sanam aakhir khudaa nahiin hotaa