aap men gum hain magar sab kii Khabar rakhate hain - Jamil Malik
aap men gum hain magar sab kii Khabar rakhate hain
ghar men baithe hain zamaane pe nazar rakhate hain
nuktaachiin dekhiye kis kis pe nazar rakhate hain
ham bhii ai diidaavaro aib-o-hunar rakhate hain
ham se ab ai garadish-e-dauraan tumhen kyaa lenaa hai
ek hii dil hai so vo zer-o-zabar rakhate hain
jis ne in tiiraa ujaalon kaa bharam rakhaa hai
apane siine men vo naadiidaa sahar rakhate hain
rahanumaa kho gaye manzil to bulaatii hai hamen
paanv zaKhmii hain to kyaa zauq-e-safar rakhate hain
vo andheron ke payambar hain to kyaa gam hai "Jamil"
ham bhii aankhon men kaii shams-o-qamar rakhate hain
0 comments:
Post a Comment