aag puurii kahaan bujhii hai abhii - Midahtul Akhtar

aag puurii kahaan bujhii hai abhii

diidaa-e-tar men tishnagii hai abhii

doston se chukaa rahaa huun hisaab

dushmanon se kahaan thanii hai abhii

dost kah kar mujhe na de gaalii

dil pe ik zakhm-e-dostii hai abhii

kaat de ye bhii khudparastii men

aur thodii sii zindagii hai abhii

jaane kyon kund ho gayaa nashtar

zakhm kii dhaar to vahii hai abhii