dil akelaa hai bahut laalaa-e-saharaa kii tarah - Mazhar Imam
dil akelaa hai bahut laalaa-e-saharaa kii tarah
tum ne bhii chhod diyaa hai mujhe duniyaa kii tarah
chhod ke jaao na yuun ahad-e-guzishtaa kii tarah
ban ke ummiid raho vaadaa-e-fardaa kii tarah
tum havaa ho bikhero mujhe saahil saahil
mauj-e-mai ho to bahaa do mujhe dariyaa kii tarah
paas rahate ho to aataa hai judaaii kaa khayaal
tum mere dil men ho andeshaa-e-fardaa kii tarah
biich men kuchh to rah-o-rasm-e-ta'alluq rakkho
ajanabii yuun nahiin milate hain shanaasaa kii tarah
0 comments:
Post a Comment